अ.भा.बंजारर समावेश इ अनुसूचित जमातीर सुचिमं वेणू इ लढाइ केवळ आरक्षणेवासंज छेनी तो बंजारार अस्तित्वेर इ लढाइ छ –      भीमणीपुत्र मोहन गणुजी नायिक

*वाते मुंगा मोलारी*

      My swan song
*अ.भा.बंजारर समावेश इ अनुसूचित जमातीर सुचिमं वेणू इ लढाइ केवळ आरक्षणेवासंज छेनी तो बंजारार अस्तित्वेर इ लढाइ छ*
भीयाओ!

      भारतेमं आलग आलग नामेती ओळखायेवाळो बंजारा इ ये देशेरो मूळनिवासी छ;नेटिव्हसन्स छ…! डाॅ.बाबासाहेब आंबेडकर भी बंजारानं “अॅबोरिनीझ” संबोथमेलो छ.मानववंशशास्त्रज्ञेर आदिम जमातीर निकष भी बंजारा पुर्ण करचं.मानववंशशास्त्रज्ञ भी बंजारानं आदिवासी समजचं. Dnt ये संज्ञा माइरो आखरीरो *टी* इ व्यंजन भी *जमात*ये शब्देर ओळख सिद्ध करचं.बंजारा  इ *आदिवासी* छ. देश पातळीपरेर बंजारार इ आइडिन्टिटी मिटायेवासंज ओ.बी.सी.बडवाडेरो नवो खुणखुण्या हुड्यांग आरो छ..!

        अनुसूचित जाती, जमाती, मागासवर्गीय यादी इ राज्य पातळीपं छ, केंद्रीय पातळीपं इ यादी रेयेनी.इ घणो महत्वेरो संविधानिक मुद्दा धेनेम लेणू गरजेर छ.ओ.बी.सी. बटवाडेर निमतेती बंजारा इ देश पातळीपरं ओ.बी.सी.ये प्रवर्गेम मोडावचं , हानू जर एकवणा शिक्कामोर्तब वेगो तो भविष्येमं बंजारा समाजेरो समावेश अनुसूचित जमातीमं वेणू ये मांगणीर वाट भी कायमेर बंद वेजायेर दाट शक्यता छ.जे राज्येमं बंजारा इ अनुसूचित  जमातीमं छ, ओ राज्येर आदिवासी जर बंजारा इ नकली आदिवासी छ हानू जर भविष्येम आवाज वटाये तो ओ राज्येर बंजारार राजकीय, शैक्षणिक आरक्षणेनं , अस्तित्वेन भी धोको निर्माण वे सकचं, इ शक्यता भी केनी नाकारतू आयेनी.येरवासं देश पातळीपरं अनुसूचित जमातीरे सूचीमं बंजारारो समावेश वेणू इज मांगणी न्याय संगत अन योग्य ठरचं..!

          आज महाराष्ट्रेमं बंजारार हिस्सेपं *साडेच्यार आमदार* ओ भी केरी तो भी दया बुद्धीर आश्रीत छ.इ एक लाज छुटेर वात छ.ओ.बी.सी.रो खुणखुण्या वतान आजी कतराक दन दुसरेर दया बुद्धीर आश्रीत करन गोर बंजारानं रमाडू करेर छ.हाद वेगीरे भियाओ आबं..!

     कनायी तिसरी अनुसूचि तो कनायी रेणके आयोग तो कनायी ओ.बी.सी. विभाजनेर खुणखुण्या वजान बंजारा समाजेर मतेर लूटेर  इ प्रकार आबं मेहेरबानी करन थांबो भा….!इज हामार कळकळीर विनंती छ..!!येमं केरी व्यक्ती द्वेष छेनी तो येमं समाज हित छ…!!!

       देश पातळीपर बंजारार आमदार, खासदार ये घटनात्मक मार्गेती निवडन जायी चाये…बंजारार राजकीय बळेर घटनात्मक सबलिकरण वेयेन चाये येरवासं देश पातळीपरं *बंजारारो समावेश अनुसूचित जमातीरे सूचीम वेणू इ गरजे छ*

      *अनुसूचित जमातीरे सूचीमं बंजारारो समावेश वेणू इ न्यायसंगत लढाइ ई बंजारार *अस्तित्वेर इ लढाई छ*

             भीमणीपुत्र 

         मोहन गणुजी नायिक

Banjara Live
www.goarbanjara.com

गजानन धावजी राठोड 

प्रमुख प्रतिनिधि – बंजारा न्यूज ऑनलाइन पोर्टल 

9619401377

Leave a Reply