आदलीको पीसू बा​ई,पालीको पीसू ये,गोरमाटी कविता युवा पीढ़ीरो कवि,लखनकुमार जाधव 

​*** आदलीको पीसू बाई,पालीको पीसू ये***



मोलेर छ चकेती,गोरमाटी तारी धाटी

पेनार जमानेम जना,खायेसारू बाटी

का भूलरोची तू,वाते ये गोरमाटी 

कांयी घणे मोलेर,वेतीती वू घटी…

चली आवचं घटी,बकम वरसेती

आटो पीसं दादी-याडी,घणे वो हुसेती

दणीया माईर पेल चकीती,वेगोची का छेटी

कांयी घणे मोलेर,वेतीती वू घटी… (1)

राम पोरेमाई जना,पीसा जावं आटो

कुकडो बांग दीयं जना,सेज वेताणी ऊटो

करणू लागीयं कांयी हूबो,पकडन तारी चोटी

कांयी घणे मोलेर,वेतीती वू घटी… (2)

वाया नातरा वेळेस,जेर जेर घटी से लातेते

गीद बोलन येकदणेम,से आटो पीसनाकतेते

वायार हाळद बी पीसतीती,घटीपर वो बेटी

कांयी घणे मोलेर,वेतीती वू घटी… (3)

धेनेम रकाड वातं,दाळदाणा भलढचं

बाटी बणायेसारू वो,घंवू-जारेन पीसचं

नानोकूछ दळीया फेरन,खरातेते पीटी

कांयी घणे मोलेर,वेतीती वू घटी… (4)

दणीयार चकी गीरणी,जना बंद पडजायं

हाहाकार माजजायं,से भेकेती भंबळाजायं

तांडो रीयं साबीत तरी,मरं कोनी बाई माटी

जना लकसेम आयं,कांयी मोलेर छ ई घटी (5)
…….. लखनकुमार मा.जाधव ……..

सौजन्य:गोर कैलास डी राठोड 

गोर बंजारा आॅनलाईन न्यूज़ पोर्टल मुंबई महाराष्ट्र राज्य 

981973477

One Comment

Leave a Reply