गोर बोलीभाषारो अलंकार संपन्न लावण्य रुप – उत्प्रेक्षा…भिमणीपुत्र,

वाते मुंगा मोलारी
My swan song

गोर बोलीभाषारो अलंकार संपन्न लावण्य रुप –

उत्प्रेक्षा…

अलंकार संपन्न गोर बोलीभाषारो लावण्य रुप इ गेणागाठा घालन सणगारी हुयी याडीभेनेर रुपेनाई नंजरेमं नावडेनी आसो देखणा रुप छ.गोर बोलीभाषारे ये लावण्य रुप सौंदर्येनं,सौंदर्य शास्त्रेर कुणसे इंच पट्टीती मोजेरो ? इ सौंदर्य शास्त्रेरे अभ्यासकेनं एक आव्हान ठरचं.गोर बोलीभाषार रुप सौंदर्येनं न्याव देयेसारू गोर बोलीभाषिक अभ्यासकेर आज नितांत गरज छ.
“जातीवंत सर्जनशील सायित्येर भाषा इ बोल,बोलीज रचं”ये सुप्रसिद्ध सायित्यिक डाॅ.विठ्ठल वाघेर केणीनं गोर बोलीभाषा सायित्य भी अपवाद छेनी.गोर बोलीभाषार लावण्य रुपेर सर इ प्रमाण भाषानं भी आयेनी.गोर बोलीभाषा मौखिक सायित्येर गोडवार चव तो स्वतंत्र सोजारो विषय छ.इ वस्तुस्थिती केनीज नाकारतू आवं कोनी.उदः-

चांदणी झुलं..रे..हुसी..
चांदणी झुलं..
तारे चांदणीरो छाटो अपेका टपेका;
जसो अंबरेरो छाटो..
चांदणी झुलं..!
एके पछेवडो सव्वा लाखेरो
तारो भायी चुकवं दाम..
होरही खेचाताण..
पछेवडो भिजेगो…!!

इ गीद “उत्प्रेक्षा अलंकारेरो उत्कृष्ट उदाहरण छ.उत्प्रेक्षा अलंकारेमं उपमेय इ जसो कांयी उपमानज छ आसे प्रकारेर कल्पना करेमं आवचं.

चांदणीरो छाटो > उपमेय
अंबरेरो छाटो > उपमान

“जसो,जसो कांयी” ये गोर बोलीभाषा शब्द उपमेय इ उपमानज छ हानू संभ्रमित करचं.
वायामं मंडेवडो ताणेवाळ डायसाण मंडेवडो ताणू करचं तो दुसरीवडी डायीसाणी वेतडूनं संबोधन गीद बोलू करचं…!
ये हूसी वेतडू देक तार चांदणी कसो झुलरी छ…? ओ चांदणी परेर पाणीर वगळ्लार अपेका,टपेकार छट्टा तो जसो आभाळेर छट्टज भास वेरे छ.चांदणीर छट्टा क,आभाळेर छट्टा ?
चांदणीर आंगपाचेर एकेक पडदातो सव्वा सव्वा लाखेर छ.भीजागे तरी फिकर मत कर.पडदा दाम भरती करेवाळो भायी तार पूटे लारं छ..ये हुसी फिकर मत कर..!

भीमणीपुत्र
मोहन गणुजी नायक

-गोर कैलास डी राठोड

गोर बंजारा आॅनलाईन न्यूज़ पोर्टल मुंबई महाराष्ट्र

Leave a Reply