गोर माटीर घटी पीसेर वेळा  ( घटीन महत्व)

=====घटी========

गोरमाटीर टांढेमा घटी पेनाती करोढो वरसेती रेतीती आन छ.घटी येळा क बेयेळा पीसेनी.हारेकेर घर घटी रेतीती.घटीपीसेर येळा क तो कूकढो बाघं देयेक येळा.रामपोर चालू वेयेर आघांढी घटी बदं वेजावछ.घटी पीसतूवणा याडी दादी मीटेदाक गीद बोलछ,वोती जेन नीधं न आरीवींय तरी वू मसटमारन सोजावछ.घटीपर आजेर परभाती दोपेर आन साजं जतरा बाटीन आटो लागछ वतराछ पीसछ.घटीती रोजेर रोज पीसछ,पीसतेते.घटी पेना करूढेंर रेतीती.करूढेंर भाटा,नीतो आपणे भाटार घटी रछ.घटीर हेटेर चाक आन वूपरेर चाक ये धरती आन आभाळ रो दर्शक छ.घटी कळावछ की पूरतवी फररीछ क आबंर फररोछ.घटीन खील्ढी रछ.पेना यी खील्ढी खेराळीर दाढेंर रेतीती.बादेम लोखंढेर बणाय.घटीर वूपरेर चाकेन हातो रछ.वो हातेती डकने हातेती जमणीवढी आन जमणे हातेती डकणीवढी याडी दादी फेरावछ.यी येक सायींटीफीकली वात छ.घटीपीसेर येळा घरोघर घटी फरतीती आन टांढेर याडी,दादी,फूपी,नानी,काकी,मामी गीदलेलेणताणी घटी पीसतीती.पीसणो वेगो की घटीर वूपरेर चाक काढनताणी कोपराम हूभो मेलदछ.वूपरेर चाकेन समो मेलेनी,वूधों मेलेनी,चतो मेलेनी.यी येक गोरमाटीर पेनार देण छ.दणीयार आटोपीसेर पेल फैक्ट्री घरोघर गोरमाटीर वेतीती.यीछ घटी वटाय आन फैक्ट्रीवाळ वोर घटा करनाके.चकी/गीरणी आवगी.आब मोटमोटी घटा घटो आवगे आन घटीरो मोल कमी वेतो चलगो.दणीयार पेल फैक्ट्री आटोपीसेर घटी छ.आन घटी हारेकेर घर रेतीती.केरी घर वाया नातरा रो की जेर जेर घटी वायावाळ छोरीर घर लातेते आन घटीती से गीदबोलबोलनताणी से आटो येकदनेमा पीसनाकतेते.वायार हाळद भी छोरी घटीपर पीसतीती.पेना तो जणा जार,घवूं वेतेछ कोनी जना येकरीया पीसतेते कछ.आन येकरीयार भलढेर दळीया खातेते कछ.मूघं वढद,बरबटी ये सीड पेनातीच छ.ये दाळ पीसेनी भलढछ.पीसेरो आन भलढेरो यी खील्ढीपर रछ.हीस्टोरीकल मेथढ,सायींटीक रीजन छ.दणदोपेर आवदसानघींया घटी कोयी पीसतीती कोनी.घटीपर दाळदाणा भलढछ.आटो पीसछ,भलढो,दळीया,दळीयावक,दळीयाभस,नाणो,नाणोकूछ,नाणोनाणोकूछ.नाणानाणोकूछ आटेर पीटी करछ.पीटी भूजंनताणी गोळसाखरीया घालनताणी भूजंण बालबछीयान दछ.नाणोकूछ आटेर बाटी/लापढे करछ.दळीया,दळीयावक,दळीयाभस सिजाढन खावछ.यी घट वेती घटातीती घटी.आसे ये घटीर घटकेर मोल वेतोतो.घटी यी पेनार टांढेर येक घणमोट देन छ.येरो मोटो मोल छ.हारेकेर घर करूढेंरी घटी रेतीती.घटी टाछेन मणकीया आतेते.वोन घटीटाछीया केतेते.घटीटाछीया येक पखेरू भी रछ.घटीर हेटेर चाक आन वूपरेर चाक दोयी टछालेतेते.टछकटछक बादछ टाछदेतेते.घटी यी कयीक टांढेमा गोरमाटीर घरोघर छ.घटी जणा यूरोप,आसीया आसे से टांढेमा लाभी खोदायीम जणा लोक वळखे.यी येक सिसटमेर देण छ.आथेन्स नघंरीर सपारटा मायी घटी लाभी,मोहनजोदाढो हाडापाम घटी लाभी.यीतीयासकार ठण लीदे आन वळखलीदे की येक सिसटमेर देण छ करन.घटी यी गोरमाटीर टांढेर आटोपीसेर दणीयार पेल कपंनी(फैक्ट्री).पेनार ब्रैढं,ब्रैंढेड घटी.आपणो यी घटी ब्रैंढ छ.लोक पेनारो ब्रैंढ छोढन हातेमा ठोळी लेताणीन आब बैढं वजारेछ.घटीर हेटेर बाजू,वूपरेर बाजू,खील्ढी,हातो,दाळदाणा वोरेर भूक,वलटो आन सलटो हातो,आटो येम आतेवतेती सायींटीक रीजन छ,हीस्टोरीकल बेस छ,सायक्लौजीकल हीटं छ,जीवोग्रौफीकल बेस छ.से वात छ.करण घटी आज भी छ.जर दणीयार चकी/गीरणी कपंनी बदं पडजाय दणीयाम हाहाकार माजजाय.भूकेती से आभंळाजाय.टांढो साबीत रीय,घटी रीय,घट रीयं,कोयी भूके मर कोनी.घटीपीसेर येळा घटी पीसते रीय.,,राजा बोलीयं आन दळ हालीयं,,यी येळा आयं.करण घरोघर घटी रेयेदीजो.घटीर आटेआतरा नैछरल आटो दणीयाम कूणसोछ छेछा.येम पोत छ,पत छ.पतेती पोत टीकालीजो आसो मारो केणो छ.

आरजूनीया सीतीया भूकीया पोसद

सौजन्य:गोर कैलास डी राठोड 

One Comment

Leave a Reply