“डावरा”  कवि: डॉ. दिलीप जाधव

डावरा
दादा कच दादीन..

 सुकागी मुंग वडदन सोयाबीन 

सुकायलाग वावरा

सांबळी काई फलाळी

करा आपळ डावरा !!ह१!!
  वडदेन खागे वांदर अण

 तुरी खागे ढोर

पळाटीन बुंडा छेनी

रोगो जको सावरा

सांबळी काई फलाळी

करा आपळ डावरा !!२!!
 दादी कच दादान…

 घरेम छेनी ज्यार दाळा 

खायेर मोटो वांदो

तु माई मांडदिनो

डावरार फांदो

हाट छेनी बजार छेनी

छेनी नुळ खोडी

 वोरे सारू मुंडो फुगान 

बेटीहेरी बोडी

लडाई करेसारू छोरा

हेरो कावरा बावरा

तु किची रंडवा 

करा आपळ डावरा !!३!!
दादा पीयायो दी गिलास तो

सांबळेनी केरी

छोडलीदो बकरान

हातेम लेलदो छरी

सक्या भिक्यान लेन जलदी आयेस थावरा

सांबळी काई फलाळी 

आज कररोचु डावरा !!४!!
झाडेहेट वावरेम 

मांडनाको चुलो

सक्या भिक्या दोईहेन

आतर पोटी धोलो

पिक छेनी पाळी छेनी

पिकरे कोनी वावरा

गोरमाटी भियाओ छोडनाको डावरा

छोड नाको डावरा.

Dr. Dilip Jadhav

कवि: डॉ. दिलीप जाधव 7350788808
Raviraj S. Pawar, Chif editor: Goarbanjara News postal and social Activities,

Website:- www.GoarBanjara.com

8976305533

2 Comments

Leave a Reply