मुके शब्द, आसे प्रकारेती समाजेरो भलो कुं करन विये ?- फुलसिंग जाधव औरंगाबाद

000
आज समाजेमा अनेक विचारधारा,अनेक संघटन, अनेक मतमतांतर वेयेर कारण समाज दनेती दन दिशाहीन तो वेरोछच ओर बरोबरच समाजेर टकडा टकडा पडेर कारण समाज कमजोर वेतो जारोछ. समाजेन कमजोर करेर प्रक्रिया कांयी थांबरी कोनीच. येर चिंता आज केनी वाटरी कोनीछ. नाने मोटे सेच कपडा काढन नाचरेछ. दरसेक कांयी वेगोरे वेगो एकदुसरेपर आक्रमणच कररेच. नानक्या कोनी देखरे, मोटो कोनी देखरेच जे मनेमा आये , जसो आये एकदुसरेन सडप सडपन धोवरेछ. एकदुसरेन वंदडेरो कतो वंदडेरो . ई कार्यक्रम मोटे प्रमाणेमा आज रबायेमा आवरोच. एकदुसरेर टांग खिचाखाचीरो खेळ सध्या आतरा जोरेती चालू छ की जगे मांईर सारी खेळ फिके पड जाये ! ई खेळ जमाजेन कमजोर करेरो प्रकार छ. येर काळजी केनी वाटेनी .आज नाने मोठेर नसे नसेमा, लोईमा ई खेळ आतरा भिनगोछ की ई खेळ रमे शिवाय केनी चैन पडेनी.येर दुष्परिणामेर केनी चिंता छेनी. आसे प्रकारेती कुं करन समाजेरो भलो विये ?
मानपानेरो इबोला रोग
ये रोगेर लागण तो नाने मोटेन सेनच लागगीछ. एखादी कार्यक्रमेर पत्रिका दिटेर दिटे तो कांयी लोक तो कार्यक्रम आयोजकेन काचो खांऊ क भुंजन खांऊ आसो रूप वतावछ. मारो नाम पत्रिकामा का छेनी ? म कांयी साधो मनक्या वाटो कांयी ?
जर नाम नाके तो केयेवाळ मारो नाम आतरा हेट कारे ?
नाम नाके फोटो न नाके तो केयेवाळ – मार फोटो का नाको कोनी ? ओर नाम – फोटो नाके तो केयेवाळ मारे बापेरो नाम फोटो का छेनी? ऊ कांयी साधा मनक्या छ कांयी ? आसे छेनी जे नखरा कांयी इबोला रोगी समाजेन वतावछ. तरीही समाज सारी सहन करलछ. ई आसो तमाशा कतराक दन समाज देखेन चाये? ई गेंदो खेळ समाज कतराक दन सहन करेन चाये ? आसे रोगीऊन समाज करताक दन पंकतेमा बसारेन चाये ?
शिकेपडे कांयी लोक आज गोंधळी बणन समाजेम प्रचंड गोंधळ घालरेच . सारी समाज व्यवस्था बिघडायरो काम सतत कररेछ . कांयी लोक तो व्देष भावनारे रोगेती आतरा विषारी वेगेच की , समाजेम विष पेरेरोच काम सतत कररेच.

नुकसान केरो ?
आज समाजेमा कोई एखादी कार्यक्रम लेयेरो घोषित किदोरे किदो तो कांई लोक लगेच उठन ओन विरोध करेर धंदो सुरु करमेलेच. म जे भूमिका लेरोछु ओती समाजेरो नुकसान तो कोनी वेरोछ, समाज टूटरोतो कोनी येरो सारासार विचार कोई कररे कोनीच.
समाज कमजोर वेतो जारोछ, समाजेन जोडेपेक्षा तोडेरच कार्यक्रम हाम रबारेछा. येर अनेक उदाहरण देतो आये. आज वेगवेगळे दकानदार आपणी दकाने सजान आपणे सामु गिराईक कुं करन आये ओरेसारु जोर जोरेती ढोल वजारेछ. कोई सिकवाडीर नामेती, कोई धर्मर नामेती , कोई पुरोगामीर नामेती , कोई धाटीर नामेती , कोई संस्कृतीर नामेती , कोई मानपानेर नामेती , कोई टांडेर नामेती ,कोई मूल निवासीरनामेती, कोई जातेर नामेती, कोई सिंधु संस्कृतीर नामेती, कोई सोतारो मान बढायेर, कोई गाळी देयर अशी नाना प्रकारेरी दकाने समाजेम सजान बेठेछ. सेनच समाजेर कळकळ , तळमळ , चिंता छ. पण कोई येरो विचार , चिंतन, मंथन कोनी कररेच की समाजेर टकडा करन, समाजेमा जहर पेरन , एकदुसरेन संपाताणी समाजेरो भलो कुं करन विये ? चिंतन बी किदेतो दुसरेरो नाश करेरो कररेच . खास वात कतो एकदुसरेन कुं करन कमजोर करतो आये , कुं करन समोरेरे मनक्यान समाजेम बदनाम करतो आये येरे सारु छेनी ऊ ताकद लगारेछ.
कोई केनी कुत्रा – कुत्री केरे, कोई ढेडिया केरे, कोई बामण केरे, कोई मसनमान केरे, कोई जांगड केरे, कोई येरे पेटेर केरे , कोई ओरे पेटेर केरे, कोई तळवा चाटु केरे , कोई पग चाटु केरे, कोई आटो चाटु केरे , कोई छेनी जकोण चाटु केरे. कोई दलाल केरे , कोई भाडखाऊ केरे, कोई समाजद्रोही केरेच आसे शब्द वापरन हाम कतरा सभ्यताहीन लोक छा येरो परिचय देते हिंडरेछा.
आज वेगवेगळी विचारधारा कारणेती समाजेमा तणाव बढतो जारोच. ई वात घण घातक छ. ई प्रकार कती तरी थांबेन चाये. आपसेमा लढन समाजेन हाम कुणसो न्याय देयेवाळ छा ? एखादी मनक्या चुकरो वेणो तो ओर कार्य पद्धतीपर न बोलेन चाये आसो येरो अर्थ छेनी. पण मर्यादाम रेताणी विचारेरो खंडन-मंडन विचारेतीच वेयेन चाये . पण आज दुर्दैव आसो छ की, एकदुसरेन याडी भेनेन गाळी देये शिवाय केरी पेट कोनी भरारोछ. एखादीर विचार न पटे तो तुफान गाळी देयेर रणसंग्राम सुरु वेजावछ.आज फेसबुक, व्हाट्सएप्प गाळीती लबालब भरेच. आपणच आपनेमा लढाई मारन कमजोर वेरेछा , व्यक्तिगत व्देष भावना बढेर कारण समाजेर शक्ति आपसेमा लढाई मारेमा खर्च वेरीछ. संस्कारहीन, सभ्यताहीनपणेरो प्रदर्शन हाम लोक कररेचा. आसो प्रदर्शन आपणे समाजेरे हितेरो छेनी येर पीडा समाजेन कती तरी वेयेन चाये. सेनच संस्कारेर आज गरज छ.
मध्य मार्ग स्विकारो
अति टोकेरो पुरोगामीपणो , अति टोकेर प्रतिगामीपणो , अति टोकेर गोरधाटीपणो, अति टोकेरो धर्म – अधर्मपणो, अति टोकेरो समाज प्रेमेर मार्गेती न जाता मध्य मार्ग स्विकारणो आज घणो गरजेरो छ.
समाजे मांईर विचारवंत, बुद्धिजीवी, वेगवेगळे संघटना चालक, मालक , समाजे मांईर से नाने मोटे,नायक, कारभारी, हसाबी, नसाबी, तरुण-तरुणी, पेनार वातेवाळ, आजेर वातेवाळ, टांढा सिस्टिमेवाळ, टांढा सिस्टिमेर भारेर, सिकवाडीवाळ, बगर सिकवाडीवाळ , बामणेन गाळी देयेवाळ, राजकारणी, बगर राजकारणी, सारी लोकप्रतिनिधी समाजेर आजेर दुर्दशा बाबत गंभीरपणे विचार करीये आस आशा छ.

फुलसिंग जाधव
औरंगाबाद
Whatsapp No. 9595765235

Leave a Reply