लाखा बळद (हूंडा) कवी: निरंजन मुडे

 *लाखा बळद (हूंडा)* 🐮 दि.८/१/२०१८

लाख मोलेरो लाखा बळद तू,
लाखेमायी वकरो !
गावडीर दूद पीलेन तू,
छेळीरे आंग झूकरो….

लाखेती कमायवाळो लाखा,
लाख रपीयाम वकगो !
लखलख वजाळेमायी,
पालडा तारो झूकगो….

हेकाड मारो लाखारे तू,
आबं जरा सदरजो !
हूंडा नामेर पेरणी वेरी,
सरळ तासेप आजो…..

याडी-बापेर लाल तू,
लाखेमायी येकं !
वकोवकाय बळद तू,
आबं मारसामूचं देकं….

कोढी कोढी जमान तारे,
हूंडार बरोबरी कीदे !
छेळी कोनीं वाघणं वेनं,
करींव येके येकेन सूदे….

छोरी दकायेन रूपवान,
हूंडा बी आडमाप चायं !
आसेती गरीबेर छचारूर,
वाया कूकायी वीय…..

दूसरे धरमेर छचार,
नोकरीन कोनी वीय कायी !
वोंदून काहा पचं,
हूंडार लालच छेयी….

हारयेक वातेर खरचो,
आदोआदो वटारे !
करताणीं कोरीकार,
सावकारीम गळो कोनी कटारे….

देकादेक गोरमाटीम आबं,
लेरे वळक पछाणं मेळावा !
लाखा बळद पसंद वीय तो,
बाजार भाव हाम कळावा….

आकीमायीती हूंडा नामेरो,
काडेसवायी आंजन !
गोरमाटीर परगती वीय कोनी,
केरो कवी नीरंजन….

कवी: निरंजन मुडे

©कवी.
*निरंजन ब. मुडे*
*चिल्ली (ई) पो.निंगणूर*
*ता.महागाव जि.यवतमाळ*
*९०८२१९९८६७*

प्रमुख प्रतिनिधी: रविराज एस. पवार
8976305533

Leave a Reply