लेप > लेपो > लिपी – इ गोरबोली भाषा शब्द व्युत्पत्तीरो पेनो

*वाते मुंगा मोलारी*
My Swan song

*लेप > लेपो > लिपी – इ गोरबोली भाषा शब्द व्युत्पत्तीरो पेनो*..!

लेपो > लिपी – इ गोरबोली भाषा शब्द व्युत्पत्तीरो पेनो”>

*लिपणे* ये शब्दे परती *लिप* इ शब्द रुढ हुवो छ,हानू जर अभ्यासक मानते विये तो *लिपी* ये शब्देरो पेनो थेट गोर याडीरे घागरेर *लेपोनं* जान भिडचं. *लिपी* ये शब्देर व्युत्पत्ती गोरबोली भाषा व्यवहारे माईर *लेपो* ये प्रचलित शब्दे माईती वेपडी हुयी छ,येनं गोरधाटीरो घणो आधार छ…!
घागरेर नऊ वार लांबीर छिटेनं सुई दोराती चिण भांजन ओनं कडेर बेतेर हासाबेती आखूड करचं.येनं *चिण भांजरो* कचं.घागरेर ये चिणेनं एक कपडार पट्टीती लेप देन चिणेनं ढाक दचं कतो कपडार पट्टी सिडनं चिणेन लेप दचं,ये आरथेती गोरबोली भाषा व्यवहारेमं *लेपो* इ शब्द रुढ हुवो छ.

*लेप > लेपो > लिपी हानू लिपी ये शब्देरो व्युत्पत्तीरो प्रवास छ*
*लिप* इ अस्सल गोरबोली भाषा शब्द मराठी सारवणे ये आरथेती गोरबोली भाषा व्यवहारेमं रुढ छ.संस्कृत *लिंप* इ शब्द गोरबोली भाषा व्यवहारे माईरे *लिप* ये शब्देरो बिघडो हुवो रुप छ.
आसे कयिक संस्कृत शब्देर व्युत्पत्ती इ गोरबोली भाषा शब्दे माईती वेमेली छ. मार आगामी *लावण* ये गोरबोली भाषा साहित्य पत्रिकामं शब्देरो पेनो जल्दी वाचेन मळ जाय.

*लख लख परवाना बावन भेजीओ*!

*वाजणा* गीदेरो नायक भोजीयार शौर्य अन शोक गाथामं लेखन परवानार उल्लेख आमेलो छ.ये वाजणामं *गोफण गोटार* भी उल्लेख आवचं.भोजीयार शोक गाथा माईर *गोफण गोटार* उल्लेख ई पाषाण युगेरो उत्तर कलखंड अन नव अश्म संस्कृतीर कालखंडेनं जान भिडचं.ये परती लिपीरो कालखंड इ नव अश्म युग सिद्ध वचं इ.स.पु.मेहर गडेनं कृषी संस्कृतीरो ऊदय हुवो अन संस्कृती हरपा ये नागरी संस्कृतीमं विकसित हुयी छ.
गोरमाटीर पुर्वज *पणि* ये आर्येर प्रमुख शत्रू रं.ई संदर्भेसह सिद्ध वेगो छ.आर्य अन पणि गणेरे दिर्घ लढाईमं गोरबोली भाषा लिपी बळन राख हुयी कोनी विये ई केपरती ?
आर्य संस्कृती इ ग्रामीण रं तो शिंग धारण करेवाळे लोक गणेर संस्कृती इ *नागरी* संस्कृती रं.आर्य लोक मूळ निवासी शिंग धारण करेवाळे शिंगी गण समुहेर *नंगरी* आंगारेती सळगान शिंगी गण समुहेपं हमला करतेते.
*नंगरी* बाळेवाळे आर्येर ई *देव नागरी* कूं ? ई प्रश्न उपस्थित वचं.आर्य लोकूनं नागरी संस्कृतीरो कुणसीज डिल मालम कोनी रं,हानू कयिक अभ्यासकेरो केणो छ.

*मार नायक बापूरी नांगर हावेली*
*तारे राजेमं आचो खादी,आचो पिदी*
*उबना देख ओडी,कडिया देख पेरी*
*मारे नायक बापुरी नांगर हावेली येss*

नागरी संस्कृतिर आसे कयिक संदर्भ गोर याडी भेने आजेताणू जतन करन आपणेवासू मेलछांडी छ.

*गोरबोली भाषारो देव नागरी लिपीती घणो कनेरो संबंध छ*

*भीमणीपुत्र*
*मोहन गणुजी नायक*

प्रमुख प्रतिनिधि : रविराज पवार 8976305533

Leave a Reply