वाते मुंगा मोलारी – भीमणीपुत्र मोहन गणुजी नायिक

*वाते मुंगा मोलारी*

            My swan song
*शस्त्र सामर्थ्येरो योद्धा खेमू भुकीया*
*एक तलवार से हिंदस्थान की तस्विर बदल गयी*
“तलवारेरे एके झटकेती हिंदूस्थानेर तस्विर बदलायेवाळे ये शस्त्र सामर्थ्येरो योद्धा खेमू भुकीयार उज्वल इतिहास 16.7.17 नं ए.बी.पी.न्युजे परती कोयी सामळेविये जना सामळेवाळे गोरमाटीर डिलेपं वीर वृतीर रुंवाडा निश्चितच हुबे वेगे विये इ साहजिक छ.गोरुरो इ कवडा देशप्रेम?  कवडी इ देशभक्ती?  येरो अनथाव भी लेणो कठीण छ.

       तलवारेर एके चोटेती हिंदूस्थानेर तस्विर बदलायेवाळे ये महान देशभक्त खेमू भुकीयार वलादेर (गोरमाटीर) तकदीर बदलायेर ताकत मात्र ये हिंदूस्थानेर डिलेम न रेणू इ एक सेती मोट शोकांतिका छ.

          ये महान देशभक्तेरे वलादेनं, पुर्वाश्रमीर चोर गुन्हेगारेर ओळख करन चोट्टी गावडी नायी गळेम *विमुक्त* नामेरो डिंगरो घालन हिंडेर एक अपमानजनक वागणूक ये हिंदूस्थानेमं मळणू इ हामारे देशभक्त वंदनीय खेमू भुकीया, वंदनीय लाखा बणजारा, *कोर गोर कचं मन भाया; म केती करु वाया?*इ समतावादी मूल्यनिष्ठा जोपासेवाळो क्रांतिसिंह  सेवालाल महाराज ये महा मानवेर देशभक्तीरो; बलिदानेरो उज्वल इतिहास आज शापीत ठरगो छ..!

     *कायी बल्ला करनाके मार गोरमाटी ये हिंदूस्थानेरो?*

         हिंदूस्थाने माइर से कोर जाती जमातीर भुक, कडापो आपणे मातेमं घालन रातदन भुको तरसो रेन ‘लदेणी’ करताणी सारी देशेर भाई/ भेनेऊन पोसेर गोरमाटी बेडो वटाये ई गोरुरो गुन्हो रं कायी? 

         ‘कोर गोरुनं सायी वेणू’ इ मानवतावादी मूल्यव्यवस्था जोपासेवाळे गोरगणेनं चोर गुन्हेगार करन संविधान हक्केती छेटी रकाडणू; ऊचल्या करन वगाणू इ हामारे पुर्वजेर देशभक्तीर, बलिदानेर इ फळ आज गोरमाटी चाखरो छ, इ कुणसो सामाजिक न्याय?

        गोरुर ये कडापेर, अन्यायेर पै न पै हिशोब मांगेवाळ शब्द सैनिकेर फौज साहित्य शिवारेमं आबं दाखल वेगी छ.गोरुरो कडापो आबं बोलेन लग्गो छ.ये देशेमं आपण वंचित छा..निर्णयप्रक्रियामं आपणो सहभाग छेनी येर जाणीव गोर भाइबंद/ याडीभेनेनं आबं वेगी छ…!

       चालो..ऊठो…नेक वा..एक वा..! आपणो गमागो जकोण गौरवशाली इतिहास,*सोनेर साखळ लगा म तो हिचतीती* इ राजेशाही थाट धुंडन काडा…ये महामानवेर प्रेरणा लेन तांडेर उज्वल भविष्येर वाट धुंडन काडा..!

         साम्राज्यवादी हुकूमशहा हिटलर कनाइ केरी बंदुकेर गोळीती कोनी चमको;पणन *लकणीती* मातरम घणो चमकतोतो इ ओरो सोतारो कथन छ.

*आतरी ताकत लकणीमं छ.**लकणी सवायी क्रांती छेनी*

        क्रांतवीर खेमू भुकीयार तलवारेती प्रेरणा लेन लकणीर चोटेती गोरुर तकदीर बदलायेर संकल्प करा इज क्रांतीवीर खेमू भुकीयार बलिदानेर; देशभक्तीर कर्ज फेडेर एक आपणेसारु नामी संधी छ..!

जय गोर!

                   भीमणीपुत्र 

                मोहन गणुजी नायिक

प्रमुख प्रतिनिधि
वाते मुंगा मोलारी

प्रमुख प्रतिनिधि – गजानन डी. राठोड

9619401377

Leave a Reply