“स्वच्च॔दी लांबडी-Romantic LamNader अन गोर छोरी”

“लांबडी, केसुला, बरु, कासी ये रान फुलेर स्वच्छंदी जगणो इ गोरूर प्रेरक ऊर्जा शक्ती छ. लांबडीरो इ गुपीत गोर छोरीऊर गोर छोरीऊर गीदे माईती अभिव्यक्त वचं. मोटीयारमाल गोर छोरीऊनं लांबडी दखागी रे दखागी तो गोर छोरी लांबडीती हितगूज करेन लग जावचं.गोर छोरीऊरो इ कलात्मक बोलणो इ सहज बोलणो रचं.ये सहज बोलणे माइरो सौंदर्य इ रानगंध लांबडी नाइज रचं..गोर छोरीऊर इ बोलणो गोरबोली भाषारो सुंदर आविष्कार छ…!

गीद-

कुण वजायो रंगी वासळीये भुरीया?

ये..वडसू आवं..ये..मोर

धिरे धिरे वासळी वजारे छोरा गोविंदा

डुंगरेती हालसे मोर

वीरारे दामणेती छुटीये बाळदा

वाजती आवये झील

वीरारे दामणेती छुटीये बाळदा

वडते आवये मोर…!

कुणं सिडायो तारो ढाबळोये लांबडी?

कुणं लगायो लांबी डोर..?

कुणं घडायो तारो रुपडोये लांबडी?..?

कुणं लगायो लांबी डोर…?



भावार्थ-

मांदी !  भुरीया पठारेपं वासळी वजायोवाळो इ कुण छ..ये..?

रे..गोविंदा..! वासळी जरा झोकेती वजा भेनं…? तार वासळीर मधुर आवाजेती मोर देख कसो आणदेती भरारी माररे छ..?

हुडे मांदी तोनं..! गोविंदार वासळीरे मधुर आवाजेती मोर भरारी माररे कोनी तो मार भाईर दामणीती छुटे जे बळदेर गळे माईर झिलेर कर्णमधुर आवाजेती मोर भरारी माररे छ..!

वेंडी कतेर…! कायी भी केवूं करी छी..? मार भाईर बळदेर गळे माइर झिलेर मधुर आवाजेती  मोर आणदेती भरारी माररे छ; इ जादू मार भाईर बळदेर गळे माइर झिलेर मधुर आवाजेर छ, तार गोविंदार वासळीर आवाजेर छेनी.

मारोणी लांबडी ! नवे नवे कपडा पेरमेली जू भास वेणू आसो नखराळो रंग,रुप अन ढंग इ तोनं कुण दिनो ..?

बावन्न कळीरे सूर्येर भी तार इ लाजरी छट्टा खोसेर ताकत वेयेनी…! करपाणो, कोमजणो, मुरझाणो ये तार स्वभावेम छेनी.

आसो स्वच्छंदी जगणो  Romantic Life अन आतरा चिरकाल टिकेवाळ ये तारे चिरंजीव सौंदर्येरो गुपीत मन कनी मांदी..?

मारोणी लांबडी! आतरा गोजीरवाणो रुप तोनं कुण दिनो..? मनं कं नी मांदी..!


           -: भीमणीपुत्र मोहन गणुजी नायक

 

Lambadi

सौजन्य:गोर कैलास डी राठोड 

गोर बंजारा आॅनलाईन न्यूज़ पोर्टल मुंबई महाराष्ट्र राज्य,

GoarBanjara News Portal Online

Tag: Banjara, Lamani Gor, Bazigar, Lambadi News, Kavita, Kavi

Leave a Reply