‘१४ वो नसाब विषयरो निष्कर्ष’ ऑल इंडिया बंजारा सेवा संघ तोडेवाळेऊन माफी छेनी

हरएक याडी बाप आपणे छोरान मोटो करेसारु जीवेरो रान करछ, छेनी जकोण वेला सोसन वंशेरो दिवो समजन ओन काबिल बणावछ. ओन काम धंदेन, नोकरीन लगावछ. वाया करावछ. याडी बापेर आशा ई रछ की छोरा बुढा पणेम दि कोळ सकेर खरावणु. ऊ छोरा मोटो वेताणी दुनियारे रंगेमा रंगावतो जावछ. हळीया हळीया याडी बापेन भुलतो जावछ. याडी बाप बुढे वेजावछ जना ओ छोरान आब ये डोकरी डोकरा कना मरच को करन वाटछ. आब ओन याडी बापेर गरज न रेयर कारण ओन याडी बाप बोझा वाटेन लगजावछ. पद , प्रतिष्ठा, पिसा ,धन , दौलतेर नशा ओन आतरी चढ जावछ की, जे याडी बाप ओन जग वताये ओ आब घरेमा अडचण वाटेन लगजावछ. उनुर मरणेर वाट देखेन लगजावछ.
असोच प्रकार आज AIBSS ये संघनारो वेगोछ. जे काळेमा दळनवळनेर , फोनेर फारशी सोय कोनी र . आसे काळेमा समाजेरो हामनेन कांयी तरी देणो छ ई शुद्ध भावना लेताणी निःस्वार्थपणेती समाजेन जगायेरो, समाजेन एक करेरो, समाजेन सन्मानेती जीवण जगेसारु जी संघटना समाजेन याडी समजन प्रामाणिकपणेती सेवा किदी ऊ आब हामनेन अडचणीर वाटेन लगगीछ. ओन जीवत रखाडन उपयोग कांयी ? ऊ बुढ वेगीेच ओरो उपयोग कांयी हामनेन ? आसो आवाज आज समाजेमांईती निकळरोछ. करनच तो ऑल इंडिया बंजारा सेवा संघेपर बोलणु कांयी लोकुन निरर्थक वाटरोछ ! ये विषयपर चर्चा करणु टाईमपास वाटरोछ. ई विषय कांयी लोकुन बेकार , बना कामेरो वाटरोछ. येनच कछ गरज सरो आन वैद्य मरो .
ये संघटनार दुर्दशान ई संघटना चलायेवाळ जतरा दोषी छ, वतराच समाज बी दोषी छ. समाज जर हमारे जुने समाज सुधारकेरे उपकारेन जागतो तो जे हाल ये संघटनार छ ऊ कोनी रेते. समाजेवडीती जो दबाव गट तयार वेयन चावतोतो ऊ तयार न वेयर कारण ई संघटना निष्क्रिय बणगीछ . पदाधिकारी आप मतलबी आन स्वार्थी बणगेछ. उनुन समाजहितेपेक्षा स्वत:रो हित महतवेरो वाटरोछ करन तो कपडा वतारन तमाशा मांडन बेठेछ !
आपणे समाजेमा शिक्षणेरो प्रचार प्रसार वेणो, समाजेर गरीबीर हालत सुधारणु, अज्ञान, अंधश्रद्धा दूर वेणो , देशभरे मांईर आपणो समाज एक वेणो येरेसारू तन, मन, धनेती जी AIBSS काम किदीच ऊ मरेर वाट आज हमारो समाज देखतो वेणो तो येरपेक्षा शरमेर वात दुसर कुणस रे सकछ !
*आज नविन पिढीमा घणे पोपट तयार वेगेछ. उनुर केणो छ की , AIBSS समाजेसारू कांईच किदी कोनीच ! ये नविन पिलीपिलान माहिती देयेमा आवछ की- आजेर पीढिन कामेर प्रकार मालम न रेयर कारण उनुन वाटछ चार टांड फरियाये , कती गोंधळ घालियाये तो ओनच काम कछ आसो समज छ. करनच उनुन AIBSS कांयी किदी कोनीच करन वाटछ. जर नाईक साहेब , AIBSS संघटना न रेती तो आज जतराबी समाजेरे नामेपर पेट भररेछ ओ सागुना नतो ढाकडार पान कडेपर बांधन जंगलेमा फरते. “ऑल इंडिया बंजारा सेवा संघ जलमेन न आवतो तो ये देशेमांई विखरारो जकोण आपणो समाज कनाईच एक कोनी वेतो, समाज जागृती कोनी वेती. समाजेन जगायेरो काम AIBSS न करतो तो हमारे लोकुर अवस्था वाघरीती पर रेती. ई सत्य कोई नाकारते वेणो तो ओ लोक पागलखानेमा भरती करेर लायकीर छ हानु वाटछ “*
वसंतराव नाईक साहेबेरी छेंडीमा ई संघटना काम किदिछ. राजाश्रय र करन ओन कनाईच रस्तापर उतरन संघर्ष करेर गरज पडी कोनी. आंदोलन, संघर्ष करेर वेळा कोनी आयी. कारण ओ काळेमा समाजेरी समस्या वेगळी वेती. समाजेन जगाडन , एकसंघ करन शिक्षणेसामु वळायेरो , गरीबी, अज्ञान , अंधश्रद्धा दूर करेरो ई प्रमुख उद्देश ओ काळेमा र करन रस्तापर ई संघटना कनाईच उतरी कोनी. निर्लोभी, निःस्वार्थी समाजसुधारक रेयर कारण ये संघनारो चेहरा आजेरी चमकोगिरी करेवाळी संघटनापेक्षा वेगळो वेतो. आज बी छ. अज्ञानी , अडाणी समाजेसारु हमार आद्य समाज सुधारक समाजेर जी मनेभावेती सेवा किदे . उनुन समाज भुलतो वेणो तो येर पेक्षा बेईमानीर वात दुसर कुणस रे सकछ. आज शेकडो संघटना समाजेमा छ. दररोज नविन संघटना जलमेन आवरीछ. उनुर मुंडीयाग कोई आदर्श न रेयर कारण अधिकांश संघटनाम उद्दामपणो , दिशाहीनता, हुल्लडबाजी दिसावछ. ऑल इंडिया बंजारा सेवा संघ ई एकमेव आसो संघटन छ जेरे कन त्यागी समाजसुधारकेरो आदर्श छ. जे संघटनामा त्याग, निःस्वार्थ सेवाभाव छेनी ओ सारी पेट भरेर आन स्वत:न वेगळो कांयी तरी सिद्ध करेसारु चलायेमा आयेवाळी दकानदारी छ. करन ई संघटन जीवतो रेणो काळेर गरज छ.

*समाजेती कोई मोटे छेनी*

श्री तिलावत साहेब सन्माननीय नेता छ पण उनुन घाई नडगी. थोडा संयम ओ पाळेन चावतोतो . पण ओ संयमेरो परिचय समाजेन दिने कोनी. करन समाजेर सहानुभूती उनुन मळी कोनीछ. AIBSS येर घटना कांयी कछ येरपेक्षा समाज कांयी कछ ई महतवेरो छ. समाजेती कोई मोटो छेनी. श्री राजू नाईक साहेब ई पद उपभोग लिदेछ पुन्हा ई पद बळजबरीती उनुरे गळेमा घालेमा आयोछ आस चर्चा छ. पण ओ दुबार ई पद न लेयेन चावतोतो. येरे लारेरो राजकारण समजरो कोनीछ. आज घडीन दोई कपडा वतारन उभे छ . दोई लार हटेन तयार छेनी. समाजेरे दृष्टिती दोई सन्माननीय व्यक्ती छ. ऑल इंडिया बंजारा सेवा संघेर घटना कांयी कछ, राष्ट्रीय कार्यकारिणी लार कांयी निर्णय लिदीछ येरेपेक्षा ही महतवेरो छ, समाज भावना. दोई समाजेती मोटे छेनी करन समाज कांयी करेर आंग दोई सन्मानेती बाजू वेणो येमाच बुद्धिमानी छ. संघटना फोडीयो, कोर्ट कचेरी करियो तो समाज तमनेन माफ कोनी कर . ई वात दोई साणे सरता गंभीरपणेती लेणो.

*वसंतराव नाईक साहेबेर विचारधारा ई ये संघटनारो प्राण*

लारेर कांही सालेती समाजेमा आसो चित्र छ की, समाजेन दुसरो कोई आदर्श, विचारधारा, रंग चालेनी . येरे कारणच चार मिनामा दि साहित्य संमेलन भरायेमा आये. जो बी व्यक्ती , संघटन , पक्ष समाजेन जो रंग, जी विचारधारा चालेनी ऊ समाजेरे मातेपर बसारेरो प्रयत्न करते वेये तो ओन समाज काकरा नाई भार फेकायेशिवाय रेयेनी पछ उ कतराई मोटो रो. *समझदार को इशारा काफी है ।*
ये संघनारो नेतृत्व करेवाळो कोई बी रो ऊ वसंतराव नाईक साहेबेर विचारेरोच चावछ. ई बगर झेंडा र संघटना छ. ये संघटनारो समाज इच झेंडा छ. समाज इच ये संघटनारो रंग छ. आत दुसर कोई रंग चालेनी, न दूसरी विचारधारा. फक्त नाईक साहेबेर विचारधारा ई ये संघटनारो प्राण छ. येमा भेळभाळ कोई न करेन चाये. येमा भेळभाळ करेवाळेन समाज माफ कोनी करं .

*तरुणेसामु नेतृत्व दो*

आज ई संघटना तोडेेरो काम आजेर साणे सरता , सन्माननीय , उच्च पदस्थ लोक कररेछ. उनुन येर जाणीव करन देयर गरज छ की ये संघटनान तमारे स्वार्थेकारण समाज ओन तुटे देयेवाळो छेनी. जो ये संघटनान तोडेरो प्रयत्न करीये समाज ओर हाल हाल करेशिवाय रेयेवाळो छेनी . ई वात धेनेमा रखाडणु. पचास लोक देशेमांईर करोडो बंजारा समाजेरी भावनाती रमते वेणो तो समाजेन बी आपणो रूप वतावणो गरजेरो छ.
समाज भवानार जो कदर कोनी करं ओन समाज धडा शिकायेशिवाय कोनी र . करन आपणे स्वार्थेसारू ये संघटनान तोडेर सपना कोई न देखणु.
श्री तिलावत साहेब आन श्री राजूसिंग नायक साहेब तम दोई वेन सन्मानेती दो, आछेती दो , बलाती दो नविन पीढिसामु , तरुणेसामु नेतृत्व दो. तम दोई जर खिचाखाचीरो खेळ रमीयो तो पछ समाजेन मजबुरीती आपणो रंग वताणो पढीये. समाज भावनारो आदर करन समाजेरे भलेसारु वेगो जे तमासो घणो वेगो तम दोई तत्काळ अध्यक्ष पदेरो राजीनामा देताणी दोई वेन तरुणेन नेतृत्व करेर संधी देणो येमाच तमारो आन समासजेरो हित छ, भलो छ. समाजेरी भावनाती रमेर चुक तम दोई न करणु , तमारे दोईर प्रतिष्ठान कती डाग न लागणु ई समाजेर भावना छ.
जतलगु तरुण पीढिरो बळ ये संघटनान मळ कोनी वतलगु ई संघटना रेताणी न र जूंच रीये. येरेसारु येमा मोटे फेरबदल करन जीवंतपणो लाणु पडीये. लारेर कांयी सालेती जे लोक दि वाक्य सुदो बोलेनी, जेन चार ओळीरो पत्र लकतो आयनी, जे समाजेती दूर छ आसे लोकुन सत्यनारायणेरो प्रसाद वेट जूं पद वेटेमा आयेछ. आसे निष्क्रिय लोक ये संघटनाती जोडन कांयी साध्य करेर छ ई कळेन मार्ग छेनी. करन ये संघटनान नवसंजीवनी देयेसारु क्रियाशील , प्रशिक्षित , संस्कारी तरुण कार्यकर्तान संधी देणो काळेर गरज छ. दुसर वात कतो जेन बी ये संघटनारो सभासद बाणायेम आये ऊ दुसरे संघटनारो कार्यकर्ता, पदाधिकारी न रेणो. जेन ये संघटनारो हिस्सो बणेर छ ऊ ओर दकान बंद करन आयेन चाये. ये पद्धतेती ई संघटन उभो किदे तोच समाजेन ऊ न्याय दिये. आसो प्रकार न करेर विये तो समाजेन समाजेरे भरोसेपर छोडन ऑल इंडिया बंजारा सेवा संघ कायमेरो विसर्जित करदो. निष्क्रिय लोकुसारू संघटन चलान समाज तोडेरो पाप तरी तमनेन लाग कोनी.
जर वसंतराव नाईक साहेबेबद्दल तमारे मनेमा श्रद्धा, आदर , सन्मानेर भावना विये तो आयेवाळ एक जुलैर आंग दोई राजीनामा देताणी तरुण पीढिन नेतृत्व करेर संधी देणो . आन समाजे मुंडीयाग जे तमासो मांड मेलेछो ऊ बंद करन समाजेर लाज रखाडणु .
**आज ऑल इंडिया बंजारा सेवा संघेमा जो कलह चालू छ ऊ समाज भवानार विचार करन न थांबो, जर श्री तिलावत साहेब, श्री राजूसिंग नायक साहेब आपणो हट्टीलोपणो न छोडे , समाजेर परीक्षाच ओ लेयर ठरामेले वेणो तो समाजेन एक जुलैर बाद ये दोईरे विरोधेमा जोरदार मोहिम सुरु करेन चाये **
बापू सेवाभाया ! ऑल इंडिया बंजारा सेवा संघेर सारी सन्माननीय सभासदेन, पदाधिकारीऊन समाजहितोरो निर्णय लेयेसारू सद्बुद्धि द.
जय सेवालाल !
*नसाब मळाव प्रमुख*
*फुलसिंग जाधव*
औरंगाबाद
Whatsapp No 9595765235

प्रमुख प्रतिनिधी: रविराज एस. पवार

बंजारा ऑनलाइन News पोर्टल 8976305533
—————————————————-

AIBSS

Leave a Reply