​तीसरे नसाबेर चर्चारो निष्कर्ष

” निष्कर्ष  ” ऑल इंडिया बंजारा सेवा संघेरो आज वय छ ६४ वर्षेरो . हमार प्रेरणास्थान वसंतराव नाईक साहेबेर छेंडीमा ई संघटना मोठ विईच . ओ काळेर   जुने समाजसुधारक आणि तरुण वरगेमा जबरदस्त ताळमेळ हेतो करन ई संघटन  ओ काळेर हसाबेती , अल्प साधन रेयर बाद बी समाजेसारू खुप कांई किदोच.

विशेष करन ओ काळेर तरुण पीढी सुज्ञ, समजदार, विचारी हेती. आजे सरीक उतावळोपणो ओ काळेर तरुणपिढीमा कोनी हेतो , करन ओ समर्पण, निःस्वार्थ, दूरदृष्टि आणि त्यागभावनाती समाजेन दिशा देयरो काम किदे. ओ काळेमा अल्प साधन रेयर बाद बी देशेमांईर गोरबंजारा समाजेन जगान, संघटित करन मुख्य प्रवाहेमा लाएरो प्रामाणिक प्रयत्न किदे ,करन आज हमारो समाज ठीकठाक जीवण जगरोच.

ऑल इंडिया बंजारा सेवा संघेर ऋण समाजेपर आतरा छ की समाज ऊ कनाईच फेड सकेनी. ई सत्य आजेर पीढी जाणेर प्रयत्न करेनी ई समाजेरो दुर्दैव छ .

आजेर पीढिन ये संघटनाबद्दल कांईच मालम छेनी , येरो एक कारण कतो नाईक साहेब जायेर बाद जे जे लोक पदेप बेटे ओ समाजेसामु विशेष धेन कोनी दिने . हळीया,हळीया यी संघटना समाज हितेती दूर वेती गी आणि स्वहितेसामु झुकती गी .ओरो परिमाण आज ई संघटना ‘कोमामा’ चलीगीच केयेन हरकत छेनी.

आज जे संघटनान हाम याडी काचा , ओ याडीर अवस्थासामु  देखेर जिम्मेदारी समाज  नामेर  बेटार छ. ओन कोमा मांईती भारं काढेर जिम्मेदारी प्रत्येक समाज घटकेर छ. ऑल इंडिया बंजारा सेवा संघेमा नविन ऊर्जा, नविन शक्ति, नविन चेतना भरेसारु जुने काळेर हमार समाज सुधारक जे शुद्ध भावनाती काम किदेते उच भावना प्रत्येकेर मनेमा रुजाणु पडीये . निःस्वार्थपणो, त्यागवृती,

समर्पणभावना ई विचारधारा लेताणी काम करणु पडीये.

सध्या जे पध्दतीती संघटना चालरीच ऊ पध्दत देखेर बाद हानु वाटच की  ई संघटना संपायेरो प्रकार छ . करन से ज्येष्ठ , आदरणीय , सन्माननीय पदाधिकारीऊन समाजेरो एकच केणो छ. आबेलगु घरबेटेबेटे जे पद वेट मेलेचो  ओ पद ताबडतोब रद्द करेन चाये .

दि आठवडार मांई संघटना पुनरबांधनी करे सारू आपण भूमिका स्पष्ट करेन चाये .

जर दि आठवाडामां कांहीच न किदेतो , आये वाळे 5 डिसेंबर 2017 ये दन गहुली, वसंतराव नाईक साहेबेर समाधी स्थळ जाताणी नाईक साहेबेरे साक्षीती ई संघटना ताबेमा लेताणी नविन सक्रिय राष्ट्रीय कार्यकारिणी  समाजेवडीती जाहिर  करेमा आणू.

समजेती कोई मोठो छेनी. करन ये संघटनार धुरा जेरे खांदेपर छ, ओ सारी समाजेर भावना समजन लेणु आणि ये चर्चामा हिस्सो लेयेवाळेर भावना समजन लेन ओरे ऊपर गंभीर चिंतन मंथन करन आपण भूमिका ताबडतोब स्पष्ट करणु .

जय सेवालाल

नसाब  ग्रुपप्रमुख, फुलसिंग जाधव, ओरंगाबाद Whatsapp No 9595765235
प्रमुख प्रतिनिधी: रविराज एस. पवार

Online banjara news portal

Website : www.GoarBanjara.com

Banjara Nasab- Banjara Panchayat
Fhulshingh jadhav

Tag: Banjara Naya- Nasab, Banjara Panchayat sabha

Leave a Reply