गोर बंजारा भाईयो एवढी कना धेन दोचो समाजेमा बढती हुंडा पद्धत समाजेरो भूषण छ कांई ? ये हुंडा पद्धतीन कुं रोकतो आये ?

*भाईयो एवढी कना धेन दोचो ?* 

—————————————

 हनुमंतखेडार सीमा राठोडेसारू महाराष्ट्रेमांईर नाने- मोठे , बुढे- ठाडेे , याडी भेने सेच मानपान,पद प्रतिष्ठारो विचार न करता  रस्तापर उतरेगे .  समाजेर एक जबरदस्त ताकद लोकुन वतादिने.

ई उदाहरण ये वातेरो संकेत दच की , गोर समाज जर एखादी वात मनेपर लिदे तो ऊ वात पुरी ताकदेती कर सकच . 

  सीमा राठोडेसारू आपण सारी आक्रोश किदे . आपणी तीव्र भावना जगेसमोर प्रगट किदे . ओमाईती समाजेरी ताकदेरो प्रकटीकरण बी वियो. सीमा न न्याय कना मळीये ई काळच ठराये. पण —-

     आज समाजेमांई असी बी जीवती सविता राठोड नामेरी छोरी  छ जे समाजेमा आक्रोश करती फररीच. पण समाज ओरे आक्रोशेसामु देखेन तयार छेनी .

   सविता राठोड (ता. मुखेड, जि. नांदेड ) ई एक गरीब कुटुंबेमांईर छोरी छ . गरीबीती लडती – लडती बी.ए.वेताणी याडी बापेर आधार बणमेलीच . सविता राठोड समाजेसमोर एक प्रश्न वटाईच . ओरो प्रश्न छ-

” *समाजेमा बढती हुंडा पद्धत समाजेरो भूषण छ कांई ? ये हुंडा पद्धतीन कुं रोकतो आये ?* ”

   ये हुंडा कारण समाजेमांईर असी शेकडो सवितार मा बाप परेशान छ . 

     हाम सामाजिक प्रश्नेसारु एक वेते वेणु तो *हुंडा* न सामाजिक प्रश्न समजन ओरे विरुद्ध सारी समाज एकजुट वेताणी हुंडा नामेर किडेन समाजेर भार कर सकानी कांई ?

    *कुंण तयार छ सविता राठोडेरो आक्रोश सांभळेन ?* ——————————————————————-

गजानन डी. राठोड

 प्रमुख प्रतिनिधि – बंजारा न्यूज 

Leave a Reply