गोर धरम काळेर गरज…

Gor Dharm Board

जय सेवालाल.
सद्या मोबाईलेपरेर गोरुम गोर धरमेर वात जोरेम चालरी छ.केरी केणू छ धरम माणसेन जोड छ,तो केरी केणू छ ई शोषन कर छ.पच जेन जेन वाट छ धरम शोषन करछ ओ आज कुणसीज धरमेम छेयी कांई ? छ तो पच उ धरम घणो आछो छ कांई? ओती पिछो छडायेर विह्य तो कुं छडातू आह्य? सेज धरमेम देव,देवळ,अंधश्रद्धा छ कांई? गोरुरो खरो धरम छ क छेनी? ये वाते उपर खल करणू गरजेर छ.

गोर वहीवाट मनजेच आपणो धरम छ
टाढांउम डायसाणे कछ आरे जराखाढं गोरुर धरम पांळणु, गोरुर धरमेती चालणु, गोरुर नघंरी धरमेर मलाजो-मोसरो करणु,धरम करणु, धरमेती वाघणु, धरमधावणीज आढ आवछ, धरम घालणु, धरम लेणु,आसे परकारेती गोरुर जीवणेर हार एक वात धरमेर नुसार आपेक्षीत छ. पाणी पराणु, बाटी खराणु, आढीआढचनेमा सायी वेणु यीछ गोरुर पेनाती धरम छ, करन धरम करो आन धरमेती रो भा हानु तांडेम हाम सामळा छा. पच धरमेरो अन गोरुरो कांई सबंध छेई हानु केतू आयेनी.गोरुरी आपणी स्वतंत्र धाटी छ,येणज प्रचलीत शब्देम लोकुन कळे सारू धरम केहेन कांई हारकत छ.

शोषणेर डर निर्थक छ
गोरवहीवाटेम नतो देव छ,न पुजा पच शोषणेर वातज आयेनी.जसो से धरम सारखे छेनी ओसोज सेती आलग हामारो धरम रखाडन शोषण मुक्त धरम कोरुन दखाळेर इ नामी संधी छ.स्त्रीप्रधान,नायनिवाडो,तांडोपंचायत,विधवा विवाह,जांगडेन भेळणो इ.कयीक विषेशनेती संपन्न गोरधाटी मनजेच गोर धरम जगेमुंढाग लान इतिहास घडेर नामी संधी छ.येती बलातो कोनी वलटो ये निमतेती आलम दनीयार गोर एकजाग भळते विह्य तो आपणे समाजेसारू आछोज छ.
जरी हीदुं, मसलमान, बुध, जैन खीरशचन सिख ये धर्म मायी गोरुरो धर्म बेसेनी,तरी हामार वहीवाट येनुती कमी छेनी हामार धरम दखायेनी तरी गोर वहीवाट,धाटी धरम छोडन छेनी.येन वजळाणू गरजेर छ.

धर्मांतरीत लोकुन होटो लातु आह्य
गोरुर आपणो धरम रो तो आपणेन दुसरे धरमेम जायेर गरज छेनी.जे चलेगेछ ओनुन होटो आयेन जागा वेजावछ.आज आपणेकन धरमज छेनी तो कत बलातु आह्य. इ वात थोडसेक आवघढ छ,
सेज गोर दुसरे कुणसेन कुणसे धरमेम जा मेले छ.हामार घरवापसी सारू इ मोको छ.जे कट्टर लोक हीदुं धरमेम छ वो लुघीं पेरन छ, जटा बढामेले छ. आन गळोमा लोणा लटकान फररेछ ये लोक सहजासहजी माळ काढन लगेछ डावरा खायेन आयेवाळ छेईछा.जे आसेज कट्टर लोक खिरचन धरमेम चलगेछ, ये लोक डैनीयल, मैरी, फर्नांडिस, यीगंरजी येसु लायेछवाळ,जल्दी होटो फरेवाळ छेनी.जे लोक बुध धर्म मा चलगेछ वो घढीघढी जे भीम केयेछवाळ, जे लोक मसनमान धरमे मा छ वो हीदींमा बोलेछवाळ, पीरेन भजेछवाळ, पण,गोर धरमेर नामेती जर आज हाम ओनेन बलाह्या ,समजान किह्या ,सेवेन एक जाग बेसीह्या तो गोरु सारू कांई अशक्य छेनी हानु वाट छ.
*जगेर गोर एकजाग लायेर संधी*
जाग जाग धरम जात बदलामेले करन sc st vj nt obc म वेटारेछा.आपणेम मोठी मोठी वाते करु कराछा.पण,आपण संख्या दखाळेसारु हाई संधी छ.संविधानेनुसार जातेप सवलते मळ छ,ओती जात छ जकोज रखाडन सवलते ला.अन धरम बदलान संघटीत वा.
से भाई सगासेन बारकाईती ईचार करणू हाईज मारोजा.
*डॉ.कृष्णा राठोड.औरंगाबाद*

Tag : Banjara religion, Gordharm, Gor Dharm, Lambadi Dharm, Lambadi Dharm

Leave a Reply